Bi nêrîna min gereg kes loman li PKK neke, ji bo tûndîtiya (şideta) vê cenga dawiyê, bi taybetî aliyên Kurd. Weke ku li ber çavan e, dewleta Tirk ti carî êrîşên xwe dijî PKK û DTP û BDP nerawestandin, ji aliyê din ve polîtîka AKP ji bo doza kurdî qet ne zelal bû, hawirdoran texmîn dikir ku di mejiyê AKPêyan de çareseriyek heye. Lê ev polîtika ku texmîn diweşand gîşte dawiya xwe. Bi gotineke din hemû tişt aşkere bû. AKP dixwest tevahiya Kurdan bi vê polotîkê bixapîne. Bi temamî çawa M.Kemal berî heştê salî hêviyeke derewîn da ber çavên Kurdan, û bi wê hêviyê hêza kurdan ji xwe re bi karanî, û paşê pêle stiyê Kurdan kir û derbasî dewleta xwe ya antî-kurdî bû(dijî Kurdan), û ta niha bi vê stratjiyê Tirk diqîrin. Xuya bû ku eynî plana AKP ji Kurdan re hazir kiribû. AKPêyan dixwest diyar bikin, ku ew ne bi stratîjiya kemalizmê ya dijî kurdan re ne. Ew dê doza kurdî çareser bikin, û Kurdan razî bikin. Erdoxan dixwest vê hêviya pêpirkî bide ber çavên Kurda, ji bo hêza wan bike xizmeta stratijiya xwe ya nû "Neo-osmanîsim", yanî avakirina împiratoriyeke osmanî ya nû. Û paşê dê weke M.Kemel Kurdan ji perlomentoyê biqewitîne, û doza kurdî li Tirkiyê bi carekê de rake, yan jî sedsaleke din di xew ke.

Meseleyeke me Kurdan heye dibêje, ku kurmî dêr ne ji dêr be, dêr nabire. PKK saziye tewre tenê bû di nav Kurdan de, ku ev stratîjiya AKP ji bin de fêm kiribû. Loma ew nehat xapandin; ne bi TRT-6ê re (ez ne dijî vê kenalê me, belam ez jê hez dikim), ne bi vekirina bi herêma Kurdistana Êrakê re, û ne jî bi Vekirina demokratîk re "Açilim".

Lê dîsa gereg em xwe ser rastiyê re çenekin. PKK wext bi temamî da AKPêyan, ji bo gotinên xwe di warê çareserkirina doza kurdî de bicih bînin, û civata Tirkiyê bi tevahî derbasî aramiyê kin.

Li dawiyê plana AKP ji bo doza kurdî aşkere bû. AKP dixwest PKK ji holê rake, û paşê Kurdan di rewşeke perîşan ke, ji bo mecbûr bibin li pey AKP bimeşen, weke Kurdên di partiyên CHP, û MHP de.  Gava ev plana AKP aşkere bû, ji nişkave Erdoxan xwe kir lehengê Xezzê, û hêsir ser zarokên Xezzê de barandin.

Kurd ne dijî piştgiriya bi Xezzê re ne, belam ew dixwazim cihan gîş bi şêniyên Xezzê re bisekine, ji bil ku tiştên Israyîl li Xezzê dike, tevahiya mirovahiyê riswa dike. Lê gav kesek, an hêzek, an dewletek dixwaze li ser jan û êşigiyên kesekî din, an miletekî din biçêrê, ew wêçaxê ji Israyîlê xerab tire. İsrayîl ji bo miletê felestînî dijminekî aşkere ye, lê AKP ji bo Kurdan dixwaze dijminahiya xwe veşêre, ew rûyê xwe bi îslamê diniximîne, bi mafên şêniyên Xezzê boyax dike.

Bêguman dilî me bi hemû xortên PKK û yên Tirkan ku roj bi roj tên kuştin dişewite, ji bil ku di dozekê de têne kuştin, di eynî demê de ev doza bi hêsanî çareser dibe, û ev xortên Kurd û Tirk dikarin di rewşeke aram de bi hev re bijîn, bigerin, bistirên, û ji hevdu hez jî bikin...

Lê berpirsiyarê kuştina van xortan AKP tenê ye. Çendîn ku partiyên kurdî, siyasetmedarên serbixwe, rewşenbîr û nivîskarên kurd yên bi awayekî ji aweyan bi doza kurdî mijûl dibin, çendîn ku têbînên wan li ser PKK û Ocelan henin jî, gereg hîro dijî siyaseta AKP bisekinin, dijî oparesiyonên ordiya Tirkan, û rê nedin mediya Tirk û Ereb Û farisan doza kurdî gemarî bikin. Ku dozeke pîroz di vê sedsala bîst û yekê de heye, bêgoman ew doza kurdîye.

Bira vê rastiyê berî hemû kesî Kurdên AKP fêm bikin, ew hîro berpirsiyarê berdewamiya vê cengê ne, ku ew 75 perlomentoyên AKP ên Kurd nameyekê ji Erdoxan re bişînin, û jê bixwazin bira opersiyon bisekinin, bira doza kurdî di sînorên Tirkiyê de bi aştî çareser bibe, yan jî emê dest ji AKP berdin, ew wê çaxê ne bes rêya demokratîk li ber çareseriya doza kurdî vedikin, belam ew wê çaxê sûzena xûna xortên Kurd û Tirk bi tevahî radiwestînin. Û dê dîrok vê fêdebûna wan bi tîpên zêrîn binivîse.