- Berî demekê rêxistineke navnetwî rapora xwe derbarî diyardeya Xetenekirinê (Sinetkirina Jinan) li Başûrê Kurdistanê belavkir. Me jî ev gutara li jêr nivîsand û me xwest di saziyeke devera Behdînan de belav bikin, lê mixabin berpirsekî mezin ê wê deverê rê neda!!!?

- Ez gutara xwe di Avestakurd de diweşînim û hêvîdarim kesên ku wê dixwînin têbîniyên xwe diyarbikin ka çi tiştê Xeter tê de heye ku deshilatdarekî Kurdistanê nehêle ev gutar bê weşandin û xwendin.. Rêz û Hurmet

Desthelat û Xetenekirin

Silêmanê Alîxan-Elmanya

Berî çend salan rêxistinên mafên mirovî eşkere kirin ku diyardeya "xetenekirinê" li Başûrê Kurdistanê heye. Paşî hejmareke kêm a saziyên medyayê hinek gutar û raport belav kirin û ew mijar azirand. Di encam de deshelatdarên deverê diyarkirin ku ewê wê diyardeya nemirovane ji nav bibin û wê zulmê li ser keçên herêmê rakin. Lê heta noke jî maye û diyare di gel zêdebûna hejimara rûniştvanan û ji dayikbûna zarokên keç, ew diyarde jî bilind dibe û li her cihekî jî bi şêwe û rêjeyekê. Bo mînak ew diyarde li devera Behdînan nîne û min bawere bêtiriya jinên wê deverê mendehoş dibin dema peyva "xetenekirin"ê guh lê dibin‌ û çê dibe bawer jî nekin ku tiştekî wisa li welatê wan heye. Çalakvanên mafên mirovî yên Kurd û biyanî jî amaje bi vê rastiyê didin û diyar dikin ku tenê li hinek gundên Behdînan di nav hinek malbatên ku ji deverên din ên Kurdistanê çûne wir, anku ew malbatên ku ne xelkên resenên Behdînanin, ev diyarde heye, lê neya zêde ye.

Ev tişt jî, wate hebûna wê diyardeyê li hinek deveran û nebûna wê li hinek deverên din, diyar dike ku ev diyarde ne beşeke ji kultura resena Kurdî û misoger ji nav gel û miletên derdor hatiye Kurdistanê, lê mixabin deshelatdarên Başûrê Kurdistanê yên ku hewlên ciddî didin ji bo kirîna xanî û tirombêlan bo xwe û kesûkarên xwe. Karekî ji dil nakin bo jinavbirina vê diyardeyê, belku hebûna wê bi ferehî înkardikin, herwesa bi sistî temaşeyî zerer û ziyanên wê dikin‌. Ev jî bi baweriya min corekê gendeliyê ye û xelkê Kurdistanê jî gendel dike û wan han dide ku bi eşkereyî keçên xwe xetene bikin, weke‌ sunneteke ola Îslamê. Herwesa dema saziyên navnetewî raportekê derdixin û amaje bi hebûna wê diyardeyê dikin li Kurdistanê û hinek hejimar û rêjeyan belav dikin, desthelatdarên Kurdistanê wan raportan red dikin û dibêjin ku zaniyariyên wan rêxistinan ne di dirustin, bêyî ku ew jî zaniyarîan bidin.

Diyare ji bilî ku ev diyardeye dijî sadetirîn bingehên mafên mirovî ye, herwesa hin caran keçên ku tên xetenekirin, rastî nexweşiyan dibin yan demê mezin dibin hest bi kêmatiyê dikin. Ji aliyekî din ve ev sunetkirin dibe sedema wê yekê ku jina Kurd ya ku di bingehê de ji gelek mafên xwe bêbare, bi rêya birîna beşeke endamê wê yê zayindeyî, ji biçûktirîn mafên xwe yên sirûştî ku ew jî hestkirina bi xweşiyê ye,‌ bê bêbar kirin. Li vir ez dibêjim; tevî wê yekê ku navê Behdînan bi paşkeftinê belav bûye, lê xwezî di warê xetenekirinê de hemû xelkê Kurdistanê wê civakê ji xwe bikin mînak, çav li wan bikin û li hêviya sozên berpirsan nemînin, ji ber ku berpirs mijûlî komkirina taybetmendiyane bo xwe û dema wan nîne xwe bi karubarên "bêserûberên jinan"ve mijûl bikin. Yan jî dibe ku deshelata Kurdistanê bi xwe jî bi şêweyekî hatine xetenekirin, lewma hest bi xweşî û nexweşiyên xelkê xwe nake!!?.

silemani_alixani@yahoo.com