Federasyona Komeleyên Kurdî li Almanya ku weke Civaka Kurd (Kurdische Gemeinde) tê naskirin, bersiva serokwezîra Alamanya Angela Merkel da ku di daxuyaniyekê de behsa serxwebûna Kurdistanê kiribû û gotibû, “dewleteke Kurdî xizmeta aştiya li navçeyê nake”. Civaka Kurdî li Almanya ji Merkel re dibêje, ne erkê Merkel û hikûmeta wê ye ku behsa serxwebûna Kurdistanê bike.
Di daxuyaniyekê de cîgirê Serokê Civaka Kurd li Almanya, Mehmet Tanriverdi ragihand: “Em li daxuyaniyên serokwezîra Almanya matmayî man. Em li benda piştgirî û rêzgirtinê bûn li hemberî hewlên demokratîk û qurbaniyên Kurdan.
Tanriverdi got “Serxwebûna Kurdistanê ne di çarçeveya erkên hikûmeta Almanya de ye û di dawî de jî mafê çarenûsê ya milletê Kurd di referanduma sala 2017 de biryar li ser hatiye dan, dema ku %93ê xelkê dawaza welatekî serbixwe bo başûrê Kurdistanê kirin.
Angela Merkel roja 19ê Hezîrana 2019 li bajarê Goslarê di civînekê de ligel hejmarek ji xwandekaran de gotibû: “Ez bi serweriya yekparçeyiya axa Iraqê re me û di wê baweriyê de me ku dewleteke Kurdî xizmeta aştiya navçeyê nake. Merkel herwiha gotibû: Divê Kurd li Iraqê xwedî rewşeke dadmend bin û ez li gel xwebirêvebirineke berfireh bo Kurdan li Iraqê me.”