Murad Karayilan piştî ku di kongreya vê dawiyê ya Kongra Gel de ji serokatiya desteya rêveber a KCKê derbasî fermanderiya HPGê bû, di hevpeyvînekê de digel ajansa nûçeyan a Firatê (ANF) pêvajoya aştî û çareseriyê li bakûrê Kurdistan û Tirkiyê nirxand.
Karayilan diyar kir ku kongreyê de biryarên girîng girtine û da zanîn, yek ji biryarên han ew e ku desteya serokatiya giştî ya Kongra Gel dikare li gorî her bûyer û pêşhatekî li ser pêvajoyê biryaran bide û wiha got: “Mînak, eger gav neyên avêtin dikare pêvajoyê bide sekinandin.
Murad Karayilan derheqê rewşa tenduristiya rêberê PKKê Abdullah Ocalan de jî axivî û ragihand, eger pêvajo dê bidome divê rewşa jiyana Ocalan were başkirin û şandeke serbixwe ya pijîşkan tenduristiya wî kontrol bikin û wiha anî ziman: “Divê rêber Apo bikaribe digel şand û kesên ku ji derve tên hevdîtin pêk bîne û bi derve re têkiliyên wî hebe. Her wiha divê alîkar û sekreterên wî hebin, ji ber ku tenê bi vî awayî dikare pêvajoya diyalogê bide meşandin.”
Fermandeyê HPGê her wiha diyar kir ku Ocalan ji bo dewlet û hikûmetê jî nameyan dinivîsîne lê haya wan jê nîne ka çi li wan nameyan tê.
Derheqê rewşa pêvajoyê de jî Karayilan destnîşan kir ku hefteya pêş me gelekî girîng û wiha axivî: “Girtîgeh tijî siyasetmedarên kurd in. Ev hemû pêvajoyê dixin zorê. Divê herkes bizanibe ku hefteya pêş me gelekî gelekî girîng e. eger helwesta niha dewleta tirk bidome dê pêvajoyê bixitime. Helbet niha nexitimiye lê ber bi xitimandinê ve diçe. Em li benda gavên wisa ne ku bikaribe me di demek kurt de razî bike lê eger tiştekî wisa neyê kirin wê demê pêvajoyê dê bixitime û berpirstiya vê yekê jî dikeve stûyê wan. Divê fişara serbazî û sîstema cerdevaniyê bidawî bibe. Di kongreyê de jî biryar hat girtin. Divê dewlet cerdevanan di warên din de binirxîne. Ji vir û pêde êdî li Kurdistanê pêwîsti bi hêzên çekdar nemaye. Ev sîstem li pêşiya aştiyê asteng e. eger ev tişt neyê kirin dê vekişîna gerîla jî bêkêr be. Rêbertiya me jî di nameyên ku ji dewletê re şandiye de ev tişt behs kiriye.”
9. civata giştî ya Kongra Gel, di heyama 30ê Hezîranê heta 5ê Tîrmeha îsal li Qendîl hat lidarxistin û di dawiyê de sîstema hevserokatiyê hat avakirin. Li gorî biryarên kongreyê, Murad Karayilan ji serokatiya desteya rêveber a KCKê derket û bû fermandeyê giştî yê HPGê. Li şûna wî, Cemîl Bayik û Besê Hozat bûn hevserokên KCKê, her wiha Remzî Kartal û Hacer Zagors bûn hevserokên Kongra Gel.
Li gorî KCKê ku PKKê li nav xwe de digire, qonaxa yekem a pêvajoyê ku vekişîna hêzên PKKê ji nav xaka Tirkiyê bû, bidawî bûye û niha jî dora dewletê ye û divê gavan bavêje.
Rûdaw – ANF
