Çend roj berê Hevserokê KCKê Cemîl Bayik di hevpeyvînên xwe de digel hinek rojname û saziyên ragihandina biyanî û tirkî bi tundî êrişî hêzên Pêşmerge yên Kurdistanê kiribû û gotibû, pêşmerge nikarin şer bikin bila Amerîka û Ewropa çekan nedin wan bila bidin PKKê çimkî pêşmerge “tenê di hizra pere, vîlla û otomobîlan de ne”.
Li hember van gotinan û li gorî malpera fermî ya PDKê, endamê Desteya Serokatiya KCKê Murad Karayilan ji Cemîl Bayik xwestibû, lêborînê ji hêzên Pêşmerge bixwaze.
Berdevkê Wezareta Pêşmerge ya Herêma Kurdistanê Helgord Hikmet jî di daxuyaniyeke nivîskî de spasiya Karayilan kir û wiha got: “Em ji ber wê yekê spasiya birêz Murad Karayilan û hemû hevalên wî yên ku hurmeta Pêşmere û Herêma Kurdistanê digirin, spas dikin. Ev helwesta wî di vê dema zor de watedar e.”
Helgord Hikmet li ser gotinên Cemîl Bayik jî ragihand, tohmet û gotinên Cemîl Bayik li dijî hêzên Pêşmerge yên ku dûrî malbatên xwe û di mercên zehmet de şer dikin û canê xwe didin, niheqî ye.
Li gorî Hikmet, gotinên Bayik de demekî de tên ziman ku stêrka Pêşmerge ji hemû demekî zêdetir geş e. Rûdaw
