Heyder Şeşo di daxuyaniyekê de behsa damezrandina partiyekê bi navê êzîdiyan dike. Şeşo ev nûçe ji Rûdawê re piştrast kir û got: “Emê partiyeke taybet bo êzidiyan damezrînin.”
Di daxuyaniyekê de ku bi navê komîteya amadekariya kongreya damezrandina kiyanekî bo êzidiyan û Fermandarê Hêzên Parastina Şingalê Heyder Şeşo raberî raya giştî hatiye kirin, hatiye gotin ku: “Êzîdî du caran li Iraqê bêpar bûn: Carekê li Bexdayê wek welatiyên Kurdistanê û careke din jî li Kurdistanê wek welatiyên iraqî.”
Fermandarê Hêzên Parastina Şingalê û Endamê Encûmena Navendî ya YNKê Heyder Şeşo di daxuyaniyeke taybet de ji Rûdawê re ragihand ku: “Ew daxuyanî ji hêla me ve derketiye û em amadekariyan bo kongreya damezrandina partiyeke siyasî ya taybet bi êzîdiyan dikin.”
Heyder Şeşo ku welatînameya wî ya almanî jî heye û niha li Almanyayê ye, herwiha got: “Ev partî bo hemû êzidiyan dibe. Lê li gorî yasaya partiyên siyasî li Kurdistan û Iraqê nabe xwediyê nasnameya welatekî din bibe endamê partiyeke iraqî. Lewma ev partî bo Herêma Kurdistan û Iraqê dibe.”
Şeşo axaftina xwe berdewam kir û got: “Deriyê vî partiyê li ber her kesî vekirî ye û di dema ragihandina komîteya amadekarî de, navê endamên wê komîteyê jî dê bên eşkerekirin.”
Derbarê mabûna xwe di nav YNKê de jî, Şeşo got: “Li gorî yasayê, ne ji mafê min e ku ez di partiyeke din de kar bikim. Lê piştî wergirtina moleta partiya nû, emê vê mijarê çareser bikin.”
Li ser navê partiya nû jî, Şeşo got: “Heta niha tu nav ji bo partiyê nehatiye destnîşankirin û me ev mesele ji kongreya damezrandinê re hiştiye.”
Heyder Şeşo roja 5ê Nîsana 2015 ji hêla hêzên Ewlekariya Dihokê hat girtin û dûre di 13ê Nîsanê de bi biryara dadgehê hat berdan. Şeşo bi mebesta komkirina piştevaniyê bo partiya xwe ya nû serdana Almanyayê kiriye û dibêje: “Ezê du heftiyan li Almanyayê bimînim û piştre vegerim Kurdistanê.”
