Hevserokê KCK Ahmed Turk dibêje ev sed sal in Tirk, Kurdan dixapînin.
Roj baş! Hun taze ji xew rabûne?
A.Turk vê peyîvê li Amerîkayê dibêje.
Baş e, amerîkî wê nebêjin ma hun ehmeq in, ku ev sed sal in tên xapandin?
Gelo ev sed sal in Tirk, Kurdan dixapînin, yan ji roja ku ew Kurdistanê û Enedolê dagirkirine, daqurtandine û pê da?
Ma di dema osmanîyan da em nehatin xapandin?
Çend awarte ne tê da mîr, beg, şêx û giregirên Kurdan, ji xeynê parastina berjewendîyên xwe yên mîrtî, begtî û şêxtîyê, ji bo azadîya gelên xwe, serxwebûna welatê xwe çi kirin?
Ji xeynê ku vê azadî û serxwebûnê bavên bin lingên wan dagirkeran û bi xwe jî zulmê li xelkê xwe bikin, çi kirin?
Bi sedan sal in em tên xapandin!
Çêlikên mar bê jhar nabe! Çêlikên wan ên îro jî em dixapînin.
Milletekî, xelkekî heke bi sedan salan were xapandin, ew millet, xelk ne normal e! Nexweşî, derd û pirsgirêka di gîyan û derûnîya wî da pir giran e!
Neteweyek, gelek azadî û serxwebûna xwe bispêre hêzên derva, yan jî qet paxavê bi van mafên çarenivîsê û xwezayî meke, ew çawa millet e, ew çawa xelk e? Pêwîst e meriv jê di nav şik û gumanê da be!
Berê ji kesek ra bigotana “ew MIT e!” Em heft qul û bûcax jê direvîyan.
Niha serokên partîyên Kurd yên mezin bi “serok” û memûrên MITê ra rudinên.
Bi vê rixistina çete û xwedîyê planên komplo û xwînî ra hevdîtinan çêdikin û peymanan girê didin.
Serok dewlet û wezîrên tirk jî dê bibêjin: “Tirkîye (bi tevê Kurdistan E.D.) ya Tirkan e!” Yan jî dibêjin: “Em enstûrmentan bi kar tînin!”
Mîna ku têr nekiribe, dîsa serokê partîyeke mezin ê rojavayê welatê me, radibe dibêje: “Em dixwezin bi MITê ra çay û qehweyek vebixwin li Enqereyê.” (!)
Rade evqas ketîbe, helbet çeteyên zengarên tarî dê cesaretê bikin hêrîşê milletê hejarê Kurd bikin, derkevin talanê, jê birevînin û dîl bigirin, li rojavayê welêt!
Kolanên bakûr û başûrên Kurdistanê ji sixûr û ajanên MIT ê diqilqilin û dikelin!
Çehş, cerdewan û kûrmên me yên ji darê, diqilqilin di kokê da!
Ji bo yekîtîya dewleta “Tirk”, ji bo rêzgirtina ala û sembolên dagirker, hezar soz tên dayîn hezar sond tên xwarin!
Fermandarê ku qedera milletekî di bin destên wî da ye, di hevpeyîvîna bi rojnamevana tirk ra ji kêfan sî û du diranên wî dibiriqin. Ku wê dîmena xweşhal di ti civîn û hevdîtinên bi Kurdan ra nîşan nedane!
Rojnamevanên tirkan jî, ji dewleta xwe ra rapor û stratejîyan amade dikin.
Y. Kuçuk çû, îcar dora Hasan Cemal!
Hasan Cemalê ku xwe “demokrat” nîşan dide û hê bi navê kalikê xwe yê yek ji qatîlên Ermenîyan Cemal Paşayî pênas e û serbilin de, çûye başûr û “vegera” gerîllayan dişopîne!
Sernivîsên wiha bi kar anîye H. Cemal:
“Karanliktan çiktilar.” (!) (Ji tarîyê derketin.)
Gerîlla bi şev vegerîyane, H. Cemal û çend gerîllayên ku ji bo xizmetê dane cem, bi nev ra gerîllayên ji vegerê pêşwazî kirine. Tabî H. Cemal peyiva „karanlik“ (tarî) mecazî bi kar anîye. Mebesta wî ji „tarîyê“, têkoşîna rewa ya gerîllayan e. Azadîya Kurdistanê ye û vê wek tarî nîşan dide!
Rojnamevanên berê wî jî, di serhildanên Ş. Seîd, Dêrsim, Agirî û heta ya Barzanî da digotin: „Maxaralarindan çiktilar.(!) (Ji şikevtên xwe derketin.) „Maxaralarinda fare gibi zehîrlendiler. (!) (Wek mişk hatin jehrîkirin di şikevtên xwe da.)
Sernivîsek din: „Bu dagin arkasi Turkiye.“ (!) (Pişt vî çîyayê „Tirkîye“ ye.)
H. Cemalê „demokrat“ li pêşîya çîyayê Kato fotoyek kişandîye û dibêje pişt vê çîyayê „Tirkîye“ye! Ziman lê nagere ku bêje Kurdistan.
H. Cemal û kesên mîna wî „demokratbûna“ xwe herhal bi partîyên Kurdan baş dane pejirandin, ku her cî ji wan ra bûye mîna rêya avê li Kurdistanê!
Hem têkoşîna giranbiha ya netewaya Kurd û hem ev sedsala bîst û yekemîn derfetên hêja pêşkêş dike ji bo azadîya Kurdistanê û ji bo hemû xelkên ku lê dijîn.
Heke em van derfetan baş bi kar bînîn û neyên xapandin!
