Erdoxan di bernameyeke France 24 de bersiva daxuyaniyên rayedarên Rûsya da ku gotibûn tirkiyê di firotina petrolê de alîkariya daişê dike û got, ku ew ji ber wan tometan gelekî xemgîn bûne, divê xwediyê wan gotinan, tometên xwe îsbat bikin, heger na, wê demê bêbextiyê li wan dikin.
Li gora Erdoxan gelekî şerm e ku rayedarên Rûsya ew gotin di derbarê Tirkiyê de kirine û heger îsbata gotinên xwe bikin, ewê dest ji kar berde. Erdoxan bi berdewamî dibêje, heger ev tomet neyêne îsbatkirin, gelo xwediyê wan tometan amade ne ji cihên xwe biçin?
Serokomarê Tirkiyê dide zanîn ku wan di sala 2014an de 79 milyon litre petrola qaçax girtine û karmendên gumrika wan ya bazirganî ew petrol yekser tune kirine.
Li hemberî van gotinên Erdoxan, Pûtîn jî gotiye, Erdoxan dest ji kar berde yan na, ew ne karê me ye û serê me jê naêşe, lê belê li Sûriyê, ji herêma ku terorîst lê dimînin, petrol bi tankêran derbasî tirkiyê dibe û zehmete ku rayedarên tirk ji vê yekê bê xeber bin, heger nizanibin jî, bela niha zanibin ku ev tişt dibe.
