Hevserokê PYD’ê Salih Mûslim derbarê şer û pevçûnên li bajarokê Rimêlan ê rojavayê Kurdistanê ji Rûdawê re axivî. Mûslim diyar kir ku ligel eşîrên ereb ên li herêmê rûniştiye û wiha got: “Em natirsin ku li Rîmêlanê eniyekî şer çêbibe, ji ber ku niyeteke wisa ya gelê ereb nîne. Ez bi şêx ê eşîrên Şerabî, Teyî û Şemeran re rûniştim. Em bi hev re gihiştin hevpeymanekê ku rêkeftinameya şerefê îmze bikin. Xala duyemîn jî ji bo rêvebirinê komîteyên hevbeş çêbûn. Me li ser vê yekê li Rimêlan û herêmên din jî ev yek çêkir. Ti teredûdên gel li ser YPG’ê nîne. Hemû jî naxwazin ku hêzên rejîmê û grûbê çekdar hebin.”
Li ser pirsa ‘Niha hêzên rejîmê li Rimêlan hene?’ hevserokê PYD’ê wiha got: “Belê hebûn, lê ma şerê Girê Zîro çi bû? Ew hêzên rejîmê ji wir çûne û neman. Duh şer qediya û li wir neman. Niha herêm di bin kontrolê de ye. Yên mane jî duh teslîmî YPG’ê bûn. Berî niha fermandarê hêzên rejîmê yên li wir û gelek leşkerên din hatibûn kuştin.”
Ev du heftibû li bajarokê Rimêlan ê girêdayî bajarê Hesekê yê rojavayê Kurdistanê şer û pevçûn di navbera YPG û hêzên rejîma Sûriyê de berdewam dikir. Heta duh zêdetirî 100 leşkerên rejîma Sûriyê yên li Rimêlan teslîmî YPG’ê bibûn. Rimêlan herêmekî cihê petrolê ye û piraniya petrola Sûriyê ji wir tê derxistin.
