Serkirdeyeke ENKSê ragihand, Nûnerê Amerîkayê yê Taybet bo Karûbarên Sûriyê James Jeffrey piştevaniya welatê xwe bo diyaloga Kurdî-Kurdî li Rojavayê Kurdistanê nîşan da.
Endama Serokatiya Encûmena Niştimanî ya Kurdî li Sûriyê (ENKS) Fesla Yûsif ji Rûdawê re ragihand, “di hevdîtina James Jeffrey ya ligel herdu aliyên Kurdî de, wî piştevaniya xwe ji bo diyaloga Kurdî-Kurdî ya li Rojavayê Kurdistanê nîşan da”, ku ew demek e di navbera ENKS û Partiyên Yekîtiya Niştimanî ya Kurdî (PYNK) de destpê kiriye.
James Jeffrey bi serdanekê li Rojavayê Kurdistanê ye û duh li bajarê Hesekê yê Rojavayê Kurdistanê li gel şandên herdu aliyên ENKS û PYNKê civiya.
Fesla Yûsif ku endama şandeya ENKSê di civîna duh a li gel Jeffrey de bûye, ti zanyariyên zêdetir derbarê hûrgiliyên hevdîtinê de aşkere nekir.
Li gor zanyariyên Tora Medyayî ya Rûdawê, hevdîtina James Jeffrey ligel şandên ENKSê û PYNKê li bingeheke serbazî ya Amerîkî li başûrê bajarê Hesekê bûye.
Endamê Polîtboruya PDK-S Neşet Zaza pêştir ji Rûdawê re dabû xuyakirin, ku “serdana Jeffry bo gihandina nerîna Amerîka li ser rewşa Sûriyê û Rojavayê Kurdistanê ye”.
Bi gotina Zaza, Jeffrey herwiha dê tekezî li ser piştevaniya welatê xwe bo diyaloga Kurdî-Kurdî li Rojavayê Kurdistanê bike.
Du aliyên sereke yên Rojavayê Kurdistanê, ENKS û PYD bi serpirteştiya Amerîka û bi piştgiriya Fransa û Herêma Kurdistanê ew çend meh in dest bi danûstandinên ji bo yekrêziya li Rojavayê Kurdistanê û çareserkirina pirsgirêkên navbera xwe kirine.
Herdu aliyan di qonaxa yekem de rêkeftineke siyasî ragihandin û tekez kirin, ku ji bo qonaxên din ew dê danûstandinên xwe li gor Rêkeftina Duhokê ya sala 2014 berdewam bikin.
PYD ku damezrênerê Rêveberiya Xweser a li Rojavayê Kurdistanê ye, piştî wê rêkeftinê bi 24 partî û rêxistin û saziyên din ên li Rojavayê Kurdistanê re eniyeke hevbeş bi navê Partiyên Yekîtiya Niştimanî ya Kurd (PYNK) pêk anî û di qonaxa duyem de li ser vî navî beşdarî danûstandinên li gel ENKSê bû.
Di qonaxa duyem a danûstandinan de, li gor daxuyaniyên ji rayedarên ENKS û PYNKê, herdu alî li ser Lêvegera Siyasî û mijara rêvebirina Rojavayê Kurdistanê li hev kirine, bi awayekê ku Lêvegera Siyasî ji bo her aliyekê %40 û %20 jî bo aliyên din ji bo aliyên din û kesatî û rêxistin û saziyên civaka sivîl be.
