Hevserokê BDPê Selahattîn Demîrtaş, bi rojnamevanan re li meclîsê hate cem hev û rojeva germ nirxand.
Di derbarê rojevê de daxuyaniyên Demîrtaş wiha ne:
– Niqaşên ku li ser navên biçine Îmraliyê hatin kirin, em texmîn dikin, di dawiyê de hikumetê bi xwe jî ew niqaşana rast nedîtine. Heta hin kesan bi me re gotin, “xwezîka me niqaşeke bi vî rengî nekira.”
– Ji bo çûyîna Îmraliyê ti serîlêdanên me çênebûn. Hikumetê ji me xwest ku em şandeyekê bişînine Îmraliyê. Niha yên ku gazî me kirin û niha jî me asteng dikin hikumet bi xwe ye.
– Şandeya ku wê biçe Îmraliyê, ne ferz e ku wana biçine Qendîlê jî. Em ê alîkariyê bikin ku peyamên Ocalan bigihêjine Qendîlê. Herkes dixwaze bi birêz Ocalan re hevdîtinê bike. Berpirsyariya kesên ku çûne Îmraliyê jî û yên ku neçûn jî gran e.
– Hevalên me yên ku diçin Îmraliyê, BDPê temsîl dikin. Bilî vê niqaşên di vê mijarê de em rast nabînin. Ku hevserokan dike bi Ocalan re çi mijar niqaş bikirana, ev hevalên me jî wê heman mijaran bi Ocalan re niqaş bikin.
– Em wek BDP, ti caran bi serokatiyeke despotîk re nabêjin erê. Ti pêşniyarên ku ji me re hatiye pêşkêşkirin a di mijara serokatiyê de tine ye. Vekirî an dizî, bi AKPê re ti hevdîtinên me çênebû ne.
– Em di hikumetê de îradeyeke cidî û biyardar nabînin. Feraseta hikumetê jî nehatiye guherîn. Lê dîsa jî em dixwazin vî şansî biceribînin û encamê bibînin. Înşellah hikumete bi pêşniyareke bingehîn a çareseriyê derkeve holê û bila em jî mehçûp bibin. 2 meh in ku pêvajo dewam dike. Heta niha tenê hikumetê gotiye, “pirsgirêka Kurd tine ye.” Gotinên wan hemû li ser çek berdanê ne. Ji van gotinan hêvîdarbûn ne pêkan e. Em dizanin ku projeya çareseriyê Ocalan pêşkêşî hikumetê kiriye. Em dipên ku projeya çareseriyê pêşkêşî me jî bê kirin.
– Lihevhatina di navbera Ocalan û Qendîlê me jî girê dide. Ku çi biryar were girtin, em ê li paş wê biryarê bisekinin. Nûçeyên di derbarê Xweseriya Demokratîk de hemû spekulatîf in. Ne Ocalan ne jî kesên din, ji statûya bona Kurdan jênagerin. Ne pêkan e ku Kurd dev ji statûyê berdin.
– Em dixwazin ku pêvajo bi awakî zelal û eşkere bê meşandin. Şandeya me ku li Îmraliyê vegere, em ê naveroka hevdîtinê di nav xwe de binirxînin û bi rayagiştî re parve bikin. Şande, wê pêşniyarên birêz Ocalan bi me re parve bike.
– Şahîn Oner bi panzêrê hate qetil kirin. Ez meraq dikim, di rojeke wiha de, ku PKKê polîsek bi vî awayî bikuşta, wê çi daxuyanî bihatana dayîn? Her kesekî wê bigota, “ev PKK dixwaze çi bike?” Xortê 19 salî hate qetil kirin, lê ti kes hestên Kurdan seh nake. Herkes dibêje, “gelo Kurd bi vê aşîtiyê re amade ne?” Kurd wê hîn çawa aştîxweziya xwe nîşan bidin.
– Piştî hevdîtinê wê zelal bibe ku pêvajo wê çawa dewam bike. Tê gotin, ku Ocalan diqehere pêvajo radiweste. Na, ev ne rast e. A ku em dibînin, ku hikumet gavan diavêje pêvajo dimeşe, ku gavan navêje pêvajo radiweste. 2 meh in ku hikumetê bi me re ti hevdîtin nekirine. Ji ber ku baweriya me bi Ocalan heye em pêvajoyê dimeşînin. Ti projeya hikumetê a çareseriyê me nedîtiye.
– Di hevdîtina yekem a li Îmraliyê de, hat gotin ku hevserok wê cara duyem biçine hevdîtinê. Him Ocalan eva got him jî rayedarên hikumetê teyît kirin. Li ser vê me navên hevserokan dan. We dûra dît ku çi bû û çi nebû.
– Pişt qetlîama Parîsê gellek caran çûne Îmraliyê. Niha Egemen Bagiş li Parîsê di derheqê qetlîama Parîsê de hevdîtinên taybet dike. Ocalan çi gotibû, “ronîkirina qetlîama Parîsê, ji bo pêşveçûna pêvajoya ku li Tirkiyê destpêkiriye gellekî grîng e.” Em seh dikin ku hikumetê ev ferq kiriye. Fikra me ev e ku xetimandin ji vir dihat. Piştî qetlîama li Parîsê, di nav her du aliyan de nebawerinek derkete holê.
– Ocalan bi malbata xwe re gotibû ku, “ez israr dikim ku bila Ahmet Turk, ez (S.Demîrtaş) û Pervîn Buldan werine hevdîtinê. Ez biryara BDPê destek dikim. Lê dîsa jî ez ji BDPê re berdidim ku bila bi xwe binirxînin. Pêvajo bi derengiyê dikeve. Min projeya çareseriya da hikumetê. Dixwazim pêşkêşî derve jî bikim. Dibe ku hikumet dixetimîne lê bila BDP nebe sedema xetimandinê.” Me jî ev nêrînên Ocalan rast dîtin û nexwast niqaşan drêj bikin. Çimkî Ocalan gotibû ku, ger şande vê heftê neyên, ez ê pêşniyarên xwe êdî pêşkêş nekim. Wê qebûl bikira ku pêvajo bi dawî bûye. Me nexwast em berpirsyariyeke wiha bigrin û ji bo vê jî me navên ku hikumet wê qebûl bike pêşkêşî wan kirin.
