Îsmaîl Beşîkçî derbarê pêvajoya aştiyê ya li bakûrê Kurdistanê de ji Rûdawê re axivî û wiha got: “Ji salên 1920an ve, Kurdistan hatiye parçe kirin. Mafê kurdane ku dewleta wan a serbixwe hebe.”
Beşîkçî ji bo çareseriya pirsa kurd jî wiha dibêje: “Berî her tiştî pêwîste kurd yekîtiya neteweyî dirûst bikin, êdî di çarçoveya Tirkiye, Îran, Iraq û Sûriyê de fikra pirsa xwe nekin. Belkî pêwîste di çarçoveya Kurdistana serbixwe de fikra çareseriya pirsa xwe bikin. Gelê kurd gelekî 50 milyoniye û wekî hemû dewletên cîhanê, pêwîste dewleta wan hebe.”
Baweriya Îsmaîl Beşîkçî bi pêşveçûna pêvajoya aştiyê ya li bakurê Kurdistanê nayê û wiha dibêje: “Hê jî leşker tên zêdekirin û hê qereqolên leşkerî tên zêdekirin. Hê serokwezîr behsa yek dewlet, yek gel û yek zimanî dike. Ji ber vê yekê baweriya min pê nîne.”
Civaknas Îsmaîl Beşîkçî tekezê li ser wê yekê dike ku pirsgirêka kurdan a nasnameyê heye û dibêje: “Pirsgirêka kurdan a herî mezin nasname ye. Li Tirkiyê kurd wekî tirk tên bi navkirin, li Îranê bi fars, li Iraq û Sûriyê wekî ereb tên bi navkirin.” (Rûdaw)
