Îro (20.05.2014) Serokê Dîwana Serokatiya Herêma Kurdistamê Fûad Husên di daxuyaniyekê de ku li ser malpera Serokatiya Herêma Kurdistanê hatiye belavkirin got: “Îro, sêşemê, Serokê Herêma Kurdistanê Mesûd Barzanî, li gor benda 12 ya madeya yekem a yasaya Serokatiya Herêma Kurdistanê, her du birêz Nêçîrvan İdrîs Mistefa Barzanî wek serokwezîr û Qubad Celal Talebanî wek cîgirê wî, bo pêkanîna kabîneya heştem a hikûmeta Herêma Kurdistanê rasipartin.”
Li gor yasayên Herêma Kurdistanê divê di hundirê 30 rojî de hikûmet bê ragihandin. Parlamentoya Kurdistanê di civîna xwe ya îro de Nêçîrvan Barzanî wek serokwezîr û Qubad Talebanî wek cîgirê serokwezîr destnîşan kirin bo pêkanîna hikûmeta nû ya Herêma Kurdistanê.
Herwiha Fûad Hisên diyar kir ku Serokê Herêma Kurdistanê fermana pêkanîna hikûmetê îmze kiriye û got: “Li gor wê fermanê divê Nêçêrvan Idrîs Mistefa Barzanî û Qubad Celal Talebanî di hundirê 30 rojî de kabîneya heştem a hikûmeta Herêma Kurdistanê pêk bînin.” (BAS)
Nêçîrvan Barzanî:
– Sala 1966’ê ji dayîk bûye.
– Li Îranê xwendina amadeyî qedandiye.
– Kurê İdrîs Barzanî û neviyê Mela Mistefa Barzanî ye.
– Di sala 1989’ê de bû endamê Polîtburoya Partiya Demokrata Kurdistanê (PDK).
– Sala 1996’ê bû cîgirê serokwezîrê Herêma Kurdistanê.
– Sala 1999’ê bû serokwezîrê Herêma Kurdistanê (Kabîneya Çarem).
– Sala 2006’ê bû serokwezîrê Herêma Kurdistanê, piştre serokatiya kabîneya heftem kir.
– Ligel Nebîle Barzanî ya keça Mesûd Barzanî zewiciye û 4 zarokên wan hene.
