Herwiha zêdetirî 15 çekdarên DAIŞê ji çeperên şer li Kobanî ber bi Bakurê Kurdistanê ve reviyan.
Peyamnêrê Rûdawê li çeperên şer li Kobanî, Imer Kalo ragihand: “Şer û pevçûn di navbera hêzên kurdî û rêxistina DAIŞê de li derdora bajarê Kobanî berdewam dikin û hejmara gundên ku ji rêxistina DAIŞê hatine rizgarkirin 100 gund derbas kiriye.”
Imer Kalo wiha got: “Hêzên kurdî li rojhilatê Kobanî derdora 20 km pêşve çûne û şervanên YPGê bi piştgiriya topbarana Pêşmerge û bombebarana balafirên hevpeymaniya navdewletî, gihiştine nêzîkî gundê Qeremox.”
Peyamnêrê Rûdawê wiha domand: “Li aliyê başûrê Kobanî jî bi derdora 25 km, hêzên kurdî li derdora gundê Kofî ne û li ser rêya Helebê jî gundê Rovî derbas kirine.”
kalo herwiha got: “Li aliyê rojavayê Kobanê jî hêzên kurdî derdora 20 km pêşve çûne û niha li derdora gundê Qereqo ne.”
Peyamnêrê Rûdawê tekez kir ku, “Duh zêdetirî 15 çekdarên DAIŞê li rojhilatê Kobanî ji ber hêzên kurdî reviyan û derbasî Bakurê Kurdistanê bûn.” (Rûdaw)
