(Dîroka nameke Cegerxwîn ya 50 sal berê)
Dîrok nayê feşkirinê, dîrok nayê bîrkirinê û reşkirinê!
Vê berbangê min malpera nivîskarê navdar Emerîkê Serdar mêze kir. Û min dîroka nameke balkêş xwend: dîroka nama Seyda Cegerxwîn, ku ewî 50 sal berê ji Bexdayê li ser navê Emerîkê Serdar şandîye Rewanê!
Ez zendegirtî û ecbmayî mam, ku çawa nivîskarê hizkirî Emerîkê Serdar bêtirî 50 salan li ser vê namê dilê xwe li ber tu kesî venekirîye! Lê ez nivîskar fem dikim û baş tê dighînim, ku ew ji bo çi ewqas wede bê deng maye! Ji ber ku tirs û xofa dewrana Stalîn heya niha jî dilê her kesîdane. Gilî li ser çîye? Hûnê niha bizanibin, gava bîranîna Emerîkê Serdar bixwînin.
EMERÎKÊ SERDAR:
«Sala 1960-î min nemek şayîrê meyî mezin Cegerxwînra şand û hîvî kir bersiva çend pirsê min bide, ku derheqa jîyan û efirandina wîda bûn, çimkî wî çaxî min dixwest derheqa wîda xebatekê binivîsim. Lê wext-wede usa bûn, ku nivîsara xebateke usa nikaribû bihata sêrî. Lema jî min nikaribû wê xebatê binivîsim.
Wî çaxî Cegerxwîn Bex’dadêda dima û zankoa dewletêda dersê ziman, edebyet û dîroka kurda dida. Zûtirekê ewî ev neme û bersiva çend pirsê min şiklê xwera tevayî minra şand. Neme bi zimanê erebî bû…».
Emerîk di malpera xwe de kopîya nama Cegerxwîn, wergera nama wî bi zimanê kurdî û ermenî, agahdarîya li ser stendina namê û bersiva pirsên xwe, ku ji kurê Cegerxwîn–Keyo stendîye, weşandîye.
Cegerxwîn Emerîk re nivîsîye:
“Emerîk Serdaryanê hizkirî!
Hîvî dikim silavkirin û qîmetkirinê mine alavî qebûlkin bona wî hereketê we, ku hûn dirêjin bona xweykirina mîrata meye edebyetê.
Min borcê qedandina tewaqekirinê we danye ser kurê xwe – Keyo Cegerxwîn, û ewê bi alîkarya min daxwaza we bîne sêrî.
Ez wera wan melûmetya dişînim,çi ku me karibû bişanda:
1. Serhatya jîyîna mine kurt;
2. navnîşa efrandinê min;
3. navnîşa wan rojnema, li ku gotar û efrandinê min çap bûne;
4. fikrê meriva derheqa efrandinê minda;
5. wênê minî teze.
Ez nava şuxulvanya weda wera açixîê here baş dixwezim.
Cegerxwîn”.
Dû re di malpera xwe de birêz Emerîkê Serdar dinvîse:
«Paşî vê nema Cegerxwîn KGB-ê gazî min kir û gotin, wekî virhada gotî pevgirêdanê min tevî şuxulkarê welatê derekeye kurd tunebin û ez gotî tu pirtûkekê nenivîsim derheqa Cegerxwînda. Heqê min çi hebû vê spartina KGB-ê neqedînim. Û min çiqas derheqa Cegerxwînda nivîsîbû, qelaşt û şewitand. A lema jî min nukaribû îdêa nivîsara monografîa derheqa Cegerxwînda bînime sêrî».
Prîskê Mihoyî.
Îjêvsk, 17.11.2012.
ÇAVKANÎ: http://kd–amarikesardar.aidonor.com/?page_id=34
