Nivîskar û rojnamevan Cengîz Çandar, ji bo nivîskarê rojnameya Starê Orhan Mîroglu peyva “cehş” bikaranî. Çandar, di qunciknivîsa xwe a îro de, gotinên Orhan Mîroglu yên ku di hevpeyvînekê de, di derheqê wî de gotibûn rexne kir û got, “tevgera psîkolojîk heta îro nikaribû min ji rastiyê dûr bixîne û îro pê ve jî nikare. Ji aliyê din, ji ber tecrûbeyên xwe ez baş dizanim ku, di nav Kurdan de “cehş” û “qoricî” tên çi wateyê. Bi mirovên wisa re ti caran karê min nebû û vê şûnda jî nabe. Brîna welatê min yê ku xwîn jê diherike pirsgirêka Kurd e, bona ku bê çareserkirin heta dawiya temenê xwe jî ez ê xebatên xwe bidomînim.”
Mîroglu çi gotibû
Orhan Mîroglu hevpeyvînek dabû rojnameya Milat û pirsa Nil Gulsum a, “kî naxwaze ku pirsgirêka Kurd çareser bibe?” wiha bersivandibû, “Yekîtiya Ewruba naxwaze ku PKK çekan berde. Hin rewşenbîrên Tirk yên wek Cengîz Çandar, ku vê aliyê Ewrupa baş dizanin, dema diçin wan derana, ji wan re dibêjin ku pêwiste PKK çekan bernede.”
