Parlementerê BDPê Altan Tan, li meclîsa Tirkiyê, li hemberî bêhûrmetiya li dijî Serokê Kurdistana Federel Mesut Barzanî xwe ranegirt û derkete ser kûrsiyê, bertekên xwe nîşana parlementerên CHP û AKPê da. Altan, di axaftina xwe de wiha got, “… Barzanî kûrmamê min e, ji vê re îtiraza we heye, ku îtirazeke we heye bibêjin. Li vira hûn mecbûrên ku ji bo cîran û welatan din zimanekî rast û dîplomatîk bikarbînin. Her gotina we a Barzanî biçûkxistinê, ku hûn dibêjin “reîsê eşîretê”, di dilê her Kurdekî de û di hundirê her mirovekî xwedan heysiyet de brînan peyda dike, bila haja we ji vê hebe. Ez vî zimanî rast nabînim. Jibîr nekin, Osman Begê ku Împaratoriya Osmanî damezrand jî reîsê eşîretekê bû. Reîsiya eşîretê ne tiştekî ku mirov pê fedî bike ye. Xwezîka hin hevalên li vir xwedan edeb, heysiyet û çanda reîsekî eşîretê bûna. Li hemberî Kurdan ev nefreta we ji kuderê tê? Li Ewrupa 6 mîlyon Arnawut hene, 2 û nîv dewletên wan hene. Herêma Taybet a Çeçenistanê heye. Herêmên taybet yên Abhaza, Nahçivanê hene. Li ser darê dinyayê tenê Kurd mexdur û mazlûm bûne xwedan rêvebiriyeke herêmî, ev kîn û nefreta we çi ye? Hûn ê bi vê kîn û nefretê çawa Tirkiyekê ava bikin? Çavên AKPê ronahî. Heta ku ev CHP’ya hebe, hûn ê hîn pirr nên bixwin…”
