Li gor agahiyên ku Rûdawê bi dest xistine, di civînên encumena kurdî de, nakokiyek li ser avakirina hêzeke taybet bi encumenê heye.
Hin partî û bi taybet her çar partiyên endamên Yekîtiya Siyasî dibêjin, pêwîst e hêzeke taybet a Encumena Kurdî hebe mîna Yekîneyên Parastina Gel yên girêdayî Partiya Yekîtiya Demokrat û piştre herdu di nava hêzeke hevgirtî têkevin bin sîbera komîteya leşkerî ya Desteya Bilind a Kurd.
Sekreterê Partiya Yekîtî Kurd li Sûriyê Îbrahîm Biro ku partiya wî di Yekîtiya Siyasî de endam e, ji Rûdawê re got, “Di civîna Encumena Kurdî ya berî 2 mehan de biryar hat dayîn ku komîteya leşkerî were aktîvkirin.”
Biro tekez kir ku divê hêzên ENKSê û YPGê tevlî hev bibin û komîteya leşkerî serpereştiya wê hêza hevgirtî bike.
Li aliyê din, Sekreterê Partiya Demokrat ya Kurd li Sûriyê Nesredîn Îbrahîm ji Rûdawê re ragihand, komîteya leşkerî dê ji 10 endaman pêk were, 5 ji Encumena Niştimanî ya Kurd û 5 ji Encumena Gel ya Rojavayê Kurdisatnê.
Nesredîn Îbrahîm
Îbrahîm diyar kir ku hêza hevgirtî ya rojava wê di bin aleke nû de kar bike û pêkhateya wê jî dê dubare were avakirin.
Li Rojavayê Kurdistanê, jibilî YPGê, gelek grûp û ketîbeyên din yên çekdarî yên kurdan hene.
Grûpa herî xurt, jibilî YPGê, Encumena Leşkerî ya Hevpar ya Kurdî ye.
Lê belê ew encumen girêdayî artêşa azad a Sûriyê ye û li parêzgehên Heleb û Idlibê karên xwe dike.
Her wiha çend ketîbeyên kurd jî hene ku girêdayî partiyên Encumena Kurdî ne wek: ketîbeya Tehsîn Memo li bajarê Amûdê ku ser bi Partiya Yekîtî ya Kurd ve ye.
Ketîbeyên Newroz, Hewar, Yûsif ELezme li herêmên Efrîn û Kobanê ku girêdayî Partiya Azadî ya Kurd in.
YPGê gelek caran di daxuyaniya xwe de tekez dike ku hêza rewa ya Rojavayê Kurdistanê ye û di bin sîbera Desteya Bilind ya Kurd de kar dike.
Lê belê nûnerê Encûmena Kurdî di Desteya Bilind de dibêjin YPGê ser bi PYDê ve ye û biryara xwe ji desteyê nastîne. (rûdaw)
