Di çarçoveya pêvajoya çareseriyê de, li ser daxwaza Rêberê PKKê Abdullah Ocalan 4 konferans wê li Enqere, Hewlêr, Amed û Ewrupayê pêk bên. Di vê bergehê de konferansa yekem îro li Enqerê li Otela Surmelî destpêkir.
Konferansa Demokrasî û Aştiyê li ser banga Yaşar Kemal, Tarik Ziya Ekinci, Vedat Turkali, Orhan Pamuk, Murathan Mungan, Rakel Dink, Prof. Dr. Yakin Erturk, Prof. Dr. İoanna Kuçuradi, Prof. Dr. Gençay Gursoy, Prof. Dr. Şebnem Korur Fincancı û Arif Sag, bi beşdariya zêdetirî 400 akademisyen, nivîskar, siyasetmedar, hunermend, aktîvîstên tevgera jinan û rewşenbîran îro li Enqereyê destpê kir û wê du roja dewam bike.
Ligel Şebnem Korur Fincancı, Murathan Mungan, Arif Sag, Gencay Gursoy, Yakin Erturk, hevserokên BDPê Selahattin Demirtaş û Gultan Kişanak, Hevseroka KCDê Aysel Tugluk, Hevserokên HDPê (Partiya Demokratîk a Gelan) Fatma Gok û Yavuz Onen, Hevserokên ODPê, Serokê EMEPê, Cîgirê Serokê Giştî yê KADEPê û gellek siyasetmedaran li salona konferansê cihê xwe girtin.
Dîsa nivîskar Berat Gunçikan, rojnamevan Nuray Mert, rojnamevan Ertugrul Mavioglu, rojnamevan Celal Başlangıç, akademisyen Prof. Dr. Ahmet Ozer, hunermend Suavi, parêzer û aktîvist Eşber Yagmurdereli jî tevlî konferansê bûn.
Konferansê bi axaftina Parlementerê BDPê yê Stenbolê Sirri Sureyya Onder destpêkir. Di konferansê de li ser demokratîkbûna Tirkiyê û aştiyeke mayînde niqaşên grîng û dîrokî wê bêne kirin.
AVESTA KURD
