Bersivek ji bo dezgehên medyaya Partiya Karkerên Kurdistanê PKK.
Di rojên borî de, rojname, malper û televîzyonên ser bi Partiya Karkerên Kurdistanê PKK ve, êrîşeke tund birin ser Tora Medyayî ya Rûdawê, bi mebesta dijayetî û kêmkirina bandora wê.
Dezgehên medyayê yên PKK belav kirine, goya belge ketine destê wan, ku Tora Medyayî ya Rûdaw, bi pereyên dezgeha istîxbarata Tirkiyê MIT, tê birêvebirin ji bo dijayetîkirin bi PKK û Prtiya Yekîtiya Demokratîk PYD ya ser bi PKK ve li rojavayê Kurdistanê.
Em li vê derê bi şêweyekî eşkere ji bo medyaya PKK dibêjin, fermo eger belge di destê we de li ser peymanên di navbera Torya Medyayî ya Rûdaw û MITê de hene belav bikin, ne ku tiştekî bi destçêkirî bînin, ku kesek nikaribe bixwîne, û bêbextiyê durust bikin ji bo ku li Rûdaw bidin.
Pêwîstiya Rûdawê bi pêwendî û pereyên dezgeha MITa Tirkiyê tune ye. Serokên PKK û PYD jî dikarin di dema rûniştinan de ligel MIT vê pirsê bînin rojevê û lêkolînê çîbikin.
PKK û PYD divê tu dezgeheke medyayê ji xwe re nekin armanc. Pêwîste hemû riyan li pêşiya karê rojnamegerî li rojavayê Kurdistanê azad bikin.
Em weke Tora Medya ya Rûdawê ji PKK re radigihînin ku eger ew êrîşên xwe li dijî Tora Medyayî ya Rûdawê berdewam bikin jî, Rûdaw dîsa ji metodên xwe yên pîşeyî û profesyonel li hember PKK dernakeve û bi tu şêweyekî êrîşê nabe ser PKK û partiyên girêdayî wê û wan ji xwe re nake hedef.
Lê belê divê PKK jî weke hemû partiyên din qebûl bike ku Tora Medyayî ya Rûdawê çaçvên xwe li hember kêmasiyan nagire û nabe sekoyeke propagandayê ji bo partiyan.
Em tenê rastiyan, zanyariyan, bûyeran radigihînin û gengeşe dikin.
Êrîşkirin û pesindan ne karê me ye. Ji ber wê yekê jî Tora Medyayî ya Rûdawê roj bi roj li hemû parçeyên Kurdistanê û ji aliyê her Kurdekî ve zêdetir dibe çavkaniya nûçe û zanyariyan.
Em ji dezgehên medyayî yên PKK dixwazin dev ji siyaseta reşkirina Rûdaw berdin.
Di heman demê de eger tiştek were serê hevkarên Rûdawê, di encama wan êrîşên reşkirinê de, em dixine stûyê wan û PKK.
Tora Medyayî ya Rûdaw
01.09.2013|
