Mehmet Akif di resepsiyonekê de ku bi mebesta salvegera 90 saliya damezrandina dewleta Tirkiyê li Hewlêrê da, wiha axifî: ‘’Peywendiyên navbera Hewlêr û Enqere berdewam ber bi pêş de diçin. Vaye sibe Tirkiye pêşwaziyê li Serokwezîrê Herêma Kurdistanê Nêçîrvan Barzanî dike.’‘
Konsulê Tirkiyê yê Hewlêrê wiha dirêjî bi axaftina xwe da: ‘’Hikûmeta Tirkiyê girîngiyeke zêde bi Herêma Kurdistanê dide, ji ber herêm ji bo Tirkiyê deriyê serekî yê İraq û Rojhilata Navîn e. Bi heman awayî ji bo Herêma Kurdistanê jî Tirkiye deriyekî girîng ê Ewropa û cîhana derve ye.’‘
Di resepsiyonê de ku Serokwezîrê Herêma Kurdistanê Nêçîrvan Barzanî û hejmarek berpirsên paye bilin ên hikûmetê amade bûn, Akif da zanîn ku li Herêma Kurdistanê 1300 şirketên Tirkiyê karê bazirganî dikin û herwiha nêzîka 30 hezar hevwelatiyên Tirkiyê jî li Kurdistanê kar dikin.
Biryar e sibe Serokwezîrê Herêma Kurdistanê Nêçîrvan Barzanî serdana Tirkiyê bike û ligel Serokwezîr Recep Tayyip Erdogan bicive. Li gor agahiyên hatine bidestxistin, di civênê de ligel peywendiyên navbera herdu aliyan dê xeta petrolê ya nû jî were gotûbêj kirin ku temam bû ye. (Basnews)
