Di nava kêmtirî salekê de piraniya rojnamevanên Tora Medyayî ya Rûdawê li bajarên Rojavayê Kurdistanê rastî girtin û gefan hatine. Ev yek jî ji aliyê hêzên ewlekariyê yên ser bi Partiya Yekîtiya Demokrat (PYD) hatiye kirin. Destpêka wan guvaş û gefan bi girtina peyamnêrê me Pêşewa Behlewî li Qamişlo destpêkir û ya dawî jî girtina peyamnêrê me Mihemed Beşar li Dirbêsiyê bû. Ev yek di demekê de ye ku Tora Medyayî ya Rûdawê molet û destûra fermî ya karkirinê ji karbidestên navçeyê standiye û pêgirê yasayên ferzkirî yên di bin desthilata PYDê de bû, tevî ku têbînî û notên wê li ser awayê rêkxistina karê rojnamevanan li Rojavayê Kurdistanê hene.
Tora Medyayî ya Rûdawê li bendê ye ku êdî rêxistinên navdewletî bêdeng nebin û li maf û selametiya rojnamevanên Rûdawê li Rojavayê Kurdistanê bipirsin. Herwiha daxwaz ji desthilatdarên PYDê dike mewda û asoya azadiya karkirina rojnamevana li navçeyên di bin kontrola xwe de berfereh bikin, da ku car din rojnamevan li wan navçeyan di bin guvaşan de nejîn û kar nekin.
Tora Medyayî ya Rûdawê
Hewlêr-Başûrê Kurdistanê
3/5/2014
