Nêçîrvan Barzanî di konferansekî rojnamevanî de ji Bexdayê ragihand ku, şanda Kurdistanî ligel Bexdayê gehiştiye rêkeftinekê lê hê rêkeftina dawî çênebûye ji ber ku çend arîşeyên din hene ku pêwîste di navbera her du aliyan de were gotûbêjkirin.
Serokwezîr Barzanî ku ev sê rojin bi serokatiya şandeke pile bilind a Hikûmeta Herêma Kurdistanê li Bexdayê ye diyar kir ku, ev rêkeftin a ku ligel Bexdayê pêkhatiye destpêkeke baş e dike ku her du alî bêhtir karibin bêgtir danûstandinan ji bo çareserkirina arîşeyên mayîn bikin û got: “Gotûbêjên her du aliyan cihê kêfxweşiya me bûn û em vê yekê bi destkefteke baş didin zanîn.”
Li gor ku Barzanî ragihandiye, rêkeftina navbera Hewlêr û Bexdayê li ser wê yekê ye ku rojane dê Hikûmeta Herêma Kurdistanê 250 hezar bermîl petrol bi rêya Iraqê bişiyêmne derve, rojane jî dê 300 hezar bermîl ji petrola Kerkûkê bişiyêne derve. Tekez li ser wê yekê jî kir ku “Arîşeya meaşê fermanberan dê di meha yek ji sala bê de çareser bibe.”
Serokwezîrê Herêma Kurdistanê aşkere kir jî ku, Bexda razî bûye ku mehane tirilyonek û du sed hezar dînarê Iraqî ji butîeya bergiriya Iraqê bişiyêne ji Hêzên Pêşmergeyên kurdistanê re.
Di dawiyê de Serokwezîr Barzanî got: “Di beramber wan arîşeyên ku hebûn de, me qonaxek baş derbas kir, em dibînin ku Heyder Ebadî niyazeke wiha dide xuyakirin, ku em bêhtir pêşbikevin û arîşeyan çareser bikin. BAS
