Li gorî zanyariyên taybet yên Rûdawê, îro her yek ji Sekreterê Partiya Demokrat a Kurdistanê-Sûriye (PDK-S) Siûd Mela û Sekreterê Partiya Yekîtiya Kurd li Sûriyê Ibrahîm Biro gihîştin Başûrê Kurdistanê û biryar e roja çarşemê 8ê Nîsanê serokê Encumena Niştimanî ya Kurd li Sûriyê (ENKS) Tahir Sifûk jî bighêje Başûrê Kurdistanê.
Tê pêşbînîkirin, ku Serokê Herêma Kurdistanê Mesûd Barzanî ligel her yek ji Sekreterê Partiya Pêşverû Hemîd Derwîş, Siûd Mella û Ibrahîm Biro bicive û pêşhateyên siyasî yên dawî li Rojavayê Kurdistanê û rewşa ENKSê, ligel wan hersê sekreteran gotûbêj bike.
Endamê Polîtburoya PDKSê Neşet Zaza ji Rûdawê re ragihand: “Serdana Serokê ENKSê û her du sekreterên PDK-Sê û Yekîtî ji bo Başûrê Kurdistanê ew e ku şandek ku ji Tahir Sifûk, Hemîd Derwîş, Siûd Mella û Ibrahîm Biro pêk tê, wê roja 12ê Nîsanê serdana Swîsrayê bike û ji wî welatî biçin çend welatên din ên ewropî, da ku helwesta ENKSê ji berpirsên welatên Ewropa re şîrove bikin.”
Derbarê nûçeya hevdîtina sekreterê partiya Pêşverû ligel Serokê Herêmê û nakokiyên navxwe yên ENKSê, Zaza red kir ku nakokiyên navxwe di nav ENKSê de hebin û got: “Eger sekreterên partiyên navborî ligel Serokê Herêmê bicivin jî wê ji bo gotûbêjkirina serdana şanda ENKSê ji bo Ewropayê be.”
Derbarê mijara leşkerî de, Zaza red kir ku ENKSê mijûlî damezrandina hêzeke leşkerî jibilî pêşmergeyên Rojavayê Kurdistanê be û got ti hêz bi navê “Leşkerên Roj” tune ye.
Di dema tevlîbûna bultineke Rûdawê de, roja duşemê, serkirdayê PDK-Sê Fêsel Îsmayîl ji Rûdawê re gotibû ku niha ENKSê dest bi damezrandina hêzeke serbazî bi navê Leşkerê Rojê kiriye û tekez kir ku hejmarek ji vê hêza leşkerî li Başûrê Kurdistanê tên perwerdekirin.
Li gorî zanyariyên taybet ên Rûdawê, piştî nîvroja şemiya borî, Hemîd Derwîş ligel Barzanî civiyabû û gazin û rexneyên partiya xwe derbarê rewşa ENKSê gihandibû Barzanî û PDK-Sê bi tekrewiyê di nava ENKSê de tohmetbar kiribû û vekişandina partiya xwe ji ENKSê dûr nedîtibû.
Herwiha li gorî heman zanyariyan, beriya hevdîtina Barzanî û Derwîş, Sekreterê Yekîtî Ibrahîm Biro û endamê polîtburoya PDK-Sê Ebdulhekîm Beşar ligel endamê polîtburoya PDKê Azad Berwarî û Berpirsê Doseya Rojavayê Kurdistanê di Serokatiya Herêmê Kurdistanê de, Hemîd Derbendî civiya bûn û daxwaz kiribûn ku ligel Serokê Herêmê bicivin.
Aliyên PDK-Sê gazin kirine û gotine ku bi sedema tunebûna piştgirî û alîkariya pêwîst, PYDê dest daniye ser Rojavayê Kurdistanê û di encama vê hevdîtinê de, Barzanî herdu sekreterên PDKSê û Yekîtî vexwendine Hewlêrê û tê pêşbînîkirin ku ligel wan û Sekreterê Pêşverû jî bicive.
Li gorî heman zanyariyan, nerazîbûn ne tenê ji aliyê Partiya pêşverû ve heye, lê ji aliyê Partiya Yekîtî ve jî dilgiranî heye û serkirdatiya partiya navborî ji sekreterê xwe Ibrahîm Biro xwestiye ku hemû dose bi Barzanî re bi awayekî vekirî û eşkere bên behskirin.
