Îro Serokê Herêma Kurdistanê Mesûd Barzanî li bajarokê Pîrmam a girêdayî Hewlêrê ligel alî û partiyên siyasî yên Herêma Kurdistanê civiya.
Endamê Polîtboruya Eniya Tirkikmanî Aydin Meirûf ku di civîna îro ya Barzanî ligel aliyên siyasî de amade bibû, ji Rûdawê re ragihand, Serokê Herêma Kurdistanê Mesûd Barzanî çend caran daxwaz ji beşdarbûyên nav civînê kir, ku eger kesek amade ye û li xwe re dibîne, kursiya Serokatiya Herêma Kurdistanê werbigre.
Ayidn Meirûf ku Parlamenterê Fraksyona Eniya Tirkmanî di Parlamentoya Kurdistanê de jî ye, herwiha got: “Civîneke erênî û zelal bû bo çareserkirina kirîzên siyasî û darayî yên li Herêma Kurdistanê. Bo çalakkirina Parlamentoya Kurdistanê komîteyek biçûk hatiye avakirin, ku ji PDK, YNK û Yekgirtû pêkhatiye.”
Aydin Meirûf herwiha got: “Mesûd Barzanî gelelk dilgiran bû li hember rewşa siyasî û darayî ya Herêma Kurdistanê û çend caran daxwaz ji hemû beşdarbûyên civînê kir, ku eger kesek amade ye kursiyê Serokê Herêma Kurdistanê werbigre, ew amade ye niha kursiyê radestî wî bike.”
Meirûf tekez kir: “Barzanî çend caran ev daxwaza xwe dubare kir, ka kî ji yên di civînê de amade bûne, amade ye kursiyê werbigre, bila kerem bike û vî erkî bigre ser mile xwe û ez jî dê piştgîriyê bidim wî.”
Wî endamê Polîtboruya Eniya Tirkmanî herwiha aşkere kir: “Ti kes ji beşdarbûyên civînê bersiva daxwaza Barzanî nedan.”
Aydin Meirûf destnîşan kir, di civînê de Barzanî herwiha bi tundî rexne li civîna 23ê Hezîranê ya Parlamentoya Kurdistanê girt û got, ku wê civînê bi giştî rewşa li Herêma Kurdistanê tevlîhev kir. Rûdaw
