Parlementerê HDPê Altan Tan ku çend caran di şandeya HDPê ya ji bo Îmraliyê de jî cîh girtibû, di hevpeyvînekî xwe ya li gel televîzyonekî Tirkiyê de diyar kir ku hem PKKê û hem jî hikûmeta Tirkiyê xwestin ku ev şer çêbibe û ragihand ku ti wateyekî vê şîdeta PKKê tine ye ku li Bakûrê Kurdistanê û Tirkiyê dimeşîne. Altan Tan di derbarê teqîna li Stenbolê û Midyatê de jî diyar kir ku, ew herdu çalakî, çalakiyên terorîstî ne û nabe ku rewa bêne dîtin û got, ez bixwe wan çalakiyan şermezar dikim.
Di berdewamiya axaftina xwe de jî Altan Tan di derbarê şîrovekirina şerê Cizîrê yê ku ji aliyê Endamê Komîteya rêveber a PKKê Duran Kalkan ve çend me beriya niha hatibû kirin û gotibû ku `me nedizanî wê dewlet wisa bike` de jî diyar kir ku lêborîna Duran Kalkan ji vê kiryara wan xirabtir e û got, divê demildest dest ji kar berde.
Li ser pirsekê, Altan Tan diyar kir ku egera wê yekê heye ku HDP bibe du beş, ji ber ku piraniya HDPyiyan muhafizekar û dîndar in û dibe ku bixwazin cuda jî bibin.
