Serokwezîrê Iraqê Heyder Ebadî daxwaz ji Partiya Karkerên Kurdistanê (PKK) dike bi tevahî ji Şingalê vekişe û radigihîne, rê nadin grûpeke ji derveyî Iraqê li nava Iraqê çek hilgire.
Heyder Ebadî di konferansa rojnamevanî ya heftane de li ser vekişîna PKKê ji Şingalê ragihand: “Me peyameke zelal gihandine wan, baweriya me ew e, divê çek tenê di destê dewletê de be. Nayê qebûlkirin di dewleteke xwedê serwerî de grûpeke çekdar a ser bi welatekî din ve hebe.”
Ebadî got jî: “Em naxwazin şerê kesekî bikin, yan şer bi wekalet bikin. Herwiha Destûra me rê nade ku ew grûpên çekdar li nava Iraqê çek hilgirin û li ser welatekî cîran wek Tirkiyê bibin gefek.”
Got jî: “Heger ew penaber in, ti pirsgirêka me bi wê yekê re nîne, ev pirseke mirovî ye, lê rê nadin ku çek hilgirin, ji ber wê me daxwaz ji PKK kir ji Şingalê vekişe.”
Berî çend rojan PKKê hêza xwe ji Şingalê vekişand û dosya ewlehiyê û hemû sînorê Şingalê radestî artêşa Iraqê, Heşda Êzidî û Heşda Şeibî kir. Lê Beyvdarê Serokomariya Tirkiyê Îbarhîm Kalin ragihand, ew ji vekişîna hêzên PKKê ji Şingalê bigûman in.
Her di wê konferansa rojnamevanî de Serokwezîrê Iraqê tekezî li ser wê kir, Iraqê sînorê xwe bi Sûriyê tund kiriye, ji bo careke din çekdarên DAIŞê nikaribin ji nava xaka Sûriyê derbas bibin û êrîşan li navçeyên cuda ên Iraqê bikin. K24
