Endamê şandeya danûstanên PDKê li Bexdayê hûrgiliyên bûyerên duh 02.10.2018ê yên li parlamentoya Iraqê û çawaniya poşmanbûnê û rêkeftina binve binve ya YNKê aşkera kir.
Şaxewan Ebdula ku endamê wê şandeya PDKê bû li Bexdayê bo danûstandinên pêkhatina hikûmeta nû ya Iraqê û pirsa kurd di tora xwe ya facebookê aşkera kirin. Şandeya PDKê bi fermana Serok Barzanî çûne Bexdayê ku hewl bidin ku kurd bi yek namzedi beşdarî proseya helbijartinê bibin. Ji ber eger rê bê dayîn ku kurdeke din bê helbijartin, wê demê ew kurdê ku bin bandora wan de be dê ew bê helbijartin.
Nivîsandina Şaxewan Ebdula waha ye:
Demên dawiyê yên helbijartina serokkomar de çi pêkhat û kê serkeft?
Gelê xwedî şeref ê Kurdistanê û endam û alîgirên partiya me PDKê!
Duh piştî proseya helbijartinê ya serokkomarê Iraqê de hin nîgeranî çêbûne û ji ber wê ez dixwazim hin hûrgiliyan bi awayek kurtî jî ronî bikim.
Ji destpêkê heta pêkhatina proseyê, PDKê û cenabê serok li gel wê bûn ku kurd bi yek namzedî biçe Bexdayê. Lê namzed kirina Berhem Salih ji aliyê YNKê ve û bê rêkeftin li gel aliyên siyasî yên Kurdistanê wisa kir ku PDK namzedê xwe nîşan bide bo wî erkî û ew jî birêz Fuad Husên bû.
Piştî wê jî li ser fermana cenabê serok em ber bi Bexdayê ve rêkevtin û rênmayiyên cenabê serok ew bû ku hewl bê dayîn bi yek namzed ve kurd beşdarî helbijartinê bibin û ev babet di navbera nûnerên xelkê Kurdistanê de bê zelal kirin. Ji bere ger rê ji xelkê din re bê dayîn dê kurdek bê helbijartin ku di bin bandora wan de be. Dema ku em bi gotûbêjan ve mijûl bûn, li gel aliyên Kurdistanî û kutleya El Bîna, ku pêkhateya Fetih û Eniya sunneyan û Dewleta yasa di nav wê pêkhateyê de ye, daxwaz li me kirin ku em rêkbikevin li gel wan û namzedê me serbixin bi garantî ve, lê bi mercekê ku em biçin nav kutleya wan û wek nûnerê wan tevbigerin û di heman rojê de jî serokkomar namzedê wan erkdar bike bo pêkanîna hikûmetê. Lê me ev yek red kir ku em namzedê xwe wek Eniya Bîna ragehînin. Ji ber me got dê wek kurd namzedê me hebe. Di vê navberê de çend carekan Pavel Talabanî û herî dawiyê jî Kosret Resûl serdana me kirin. Herî dawiyê jî zanîn ku em naçin jor û daxwaza rêkeftinên kirin ku Berhem Salih xwe vekêşe li hember hin payeyên din. Di wê demê de beşeke din ê YNKê wek 16ê cotmehê li gel kutleya El Bîna rêkeftin û ji wan re gotin ku amadene li gel wan rêkbikevin û namzedê wan wek beşek be ji kutleya wan. Piştî wê demildest peyvendî pêkanîn ku ew ji wî tiştî paşde gav davêjin û dê bikevin parlamentoyê û bê ku namzedê me bigehe parlamentoyê dest bi proseya helbijartinê kirin. Ji ber wê jî PDKê biryar da xwe vekêşe û rê nede neyarên gelê me nûnerê kurd helbijêrin.
Di dawiyê de jî ji partiyan re dibêjim, em serkeftina îradeya xwe radestî bêgane bikin naxwazin û serkeftinê di wê de dibînin ku baweriya gelê Kurdistanê bidest bixin û piraniya kursiyên xelkê Kurdistanê bidest xistin bo me şeref û serbilindiya herî mezin e.
Ji ber wê jî daxwazê ji we dikim ahenga serkeftina lîsteya PDKê berdewam bikin û pêşerojeke geş dê li benda we be.
Dawiyê de jî dibêjim a giring ew e ku mirov bê rêz û hurmet nebe.
Bijî Kurd Bijî Kurdistan
Şaxewan Ebdula
