Piştî ku Wezîra Berevaniyê ya Almanyayê derbarê avakirina navçeyeke aram li jêr kontrola hêzên navdewletî li Rojavayê Kurdistanê pêşkêş kir, tê gotin ku hikûmeta wî welatî amade ye 2 hezar û 500 serbazan bişîne Rojava.
Wezîra Berevaniyê ya Almanyayê Annegret Kramp-Karrenbauer projeya xwe derbarê avakirina navçeyeke aram li jêr çavdêriya hêzên navdewletî li Rojavayê Kurdistanê di civîna wezîrên berevaniyê yên NATOyê de pêşkêş kir. Wezîra almanî tekezî li ser wê kir ku divê ew dever tenê bo kontrola Tirkiye û Rûsyayê neyê hiştin û ragihand ku rewşa heyî ji bo çareseriyê têrî nake.
Li gor medya Almanyayê, Sererkaniya Artêşa Almanyayê, eger derbarê pêkanîna navçeyeke aram biryareke navdewletî bê wergirtin, amade ye 2 hezar û 500 serbazan bişîne Rojavayê Kurdistanê bo parastin û çavdêrîkirina wê deverê.
Herwiha li gor medya heman welatî eger hêzêke navdewletî li wê deverê di çarçova wê projeya Almanyayê de li Rojavayê Kurdistanê bê erkdarkirin, Almanya amade ye pêşengiya wê hêzê bike.
Li gor Sererkaniya Almanyayê ew navçeya aram a ku tê plankirin dê bi dirêjahiya 40 kîlometran û bi kurahiya 30 kîlometran be. Pisporên serbazî yên Almanyayê jî dibêjin, di wê hêza bê şandin de dê tîmên çavdêriyê, hêzên taybet, yekîneyên zirhî, çekên giran û tîmên paqijkirina mayînan hebin.
Li gor wan zanyariyan Almanya amade ye bi balafirên keşfê yên Tornado û jetên Eurofighter piştevaniya asmanî jî bide wê hêzê.
Li aliyê din Sekreterê Giştî yê NATOyê Jens Stoltenberg jî pêşwazî li wê projeya Almanyayî kiribû û gotibû, “Girîng e ku hevalbendên NATOyê projeyan pêşkêş bikin. Bi van cure projeyan pêşketin çêdibe û çareseriyên polîtîk ên mayînde tên dîtin.”
Wezîrê Berevaniyê yê Belçîkayê Didier Reynders jî li ser wê projeya Almanyayê gotibû, “Li ser nexweşeyê guhertin çêbûne. Divê pêşiyê çavdêrî li ser rewşê bê kirin û li gor wê gav bên avêtin.”
Lêbelê Rûsya li dijî plana navçeyeke aram li Rojavayê Kurdistanê ku NATO tê de beşdar û erkdar be. Rûdaw
