Her du alî li ser rojava nakok in. Ji ber wan nakokiyên di navbera her du aliyan de jî, Kongreya Netewî ya Kurd ku divabû li Hewlêrê li darketiba, têk çû û bi serî nebû.
Hefteya borî Qendîlê navbênkarek (Heme Emîn Pencewînî) şandibû cem serokwezîrê Kurdistanê û cîgirê serokê PKD Nêçîrvan Barzanî. Barzanî eşkere gotibû ku ew qebûl nakin, aliyekî siyasî bi zora sîlehê (mebest PYD) li ser rojava bibe hakim û zilmê li partiyên din bike.
Berî çend rojan şandek ji KNK (Kongreya Netewî ya Kurd) ku navenda wê bajarê Brukselê ye, çûbû Qendîlê.
Li Qendîlê her du alî (KNK, PKK) li ser pêwendiyên bi PDK re axifîbûn.
Li gor endamê desteya Rojan Hazim, berpirsiyarên KCK-PKK ji wan re gotine ku ew dixwazin ligel serokatiya PDK û herêma Kurdistanê biaxifin û li ser maseyê pirsgirêkên xwe gotûbêj bikin.
Hazim ji Rûdawê re diyar kir, wê mijara rojavayê Kurdistanê mijara wan ya sereke be.
Heta niha roja hevdîtina KCK û PDK nehatiye diyarkirin, lê tê çaverêkirin ku ew hevdîtin li Hewlêrê pêk were.
AVESTA KURD
